تجربتي مع موقع كوبارت

في البداية كنت أبحث عن سيارة كامري تكون مستعملة سنتين أو ثلاثة وماتكون مستهلكة 

فوجدت فرق كبير  بين أسعار السيارات الخليجية و سيارات الوارد.

فصرت أبحث عن سيارة وارد ومايكون حادثها كبير وصرت كل ما شوف سيارة وارد اطلب رقم الشاسيه وشوف صور حادثها على الانترنت 

وبعدين لقيت أنه حتى السيارات الوارد لما تكون الضربة مو كتير قوية عم تكون أسعارها غالية عليي. 

فقلت ليش ما وفر الربح يلي بده ياخده مني تاجر السيارات واشتري بنفسي 

فقررت شوف على موقع كوبارت بعد ما سمعت عنه وصرت

#أقرأ الشروط والأحكام والرموز ومعانيها 

(لازم تعرف كل حرف بالمعلومات الموجودة عن السيارة شو معناه لأنه ممكن يكلفك غالي وممكن تفكر شي ويطلع شي) 

#وأحضرت مزادات مباشرة كتير لأعرف كم متوسط سعر السيارة يلي عم دور عليها 

(هي الشغلة مهمة لحتى تعرف كم السيارة النظيفة يلي بدك ياها عم تنباع بالمزاد) 

بعدين صرت حاول أتواصل مع الموقع لأقدر زايد واحصل على صلاحية للمزايدة. 

ووجدت أنه الشركة لها فرع في دبي الصناعية جبل علي. 

اتصلت فيهم واستفسرت عن طريقة الاشتراك يلي بتحكي معك فلبينية 

وبتحسها مو مبسوطة بشغلها ففي شغلات مافهمتها منها على الهاتف مزبوط 

فقررت روح على الشركة شخصياً 

السمسار هو المسؤول عن المزادات يلي بأمريكا :

في أنواع للحسابات لتقدر تزايد على السيارة :

النوع الأول premium وهذا فيك تزايد على أكثر من سيارة بنفس الوقت وبهذا الحساب لازم تحط مبلغ تأمين بحساب البنك تبع الشركة الرئيسية بأمريكا ولحتى تحصل على هذا الحساب لازم يكون عندك:

1- رخصة تجارية

2- زائد عندك رسوم اشتراك تقريبا 200 دولار 

النوع الثاني الحساب العادي يلي ممكن تعمله أونلاين وهذا فيك تزايد فيه على سيارة واحدة فقط لحد الألف دولار. 

لو حبيت تشتري سيارة بأكثر من ألف دولار لازم تودع مبلغ 10% من قدرتك على المزايدة. 

يعني مثلاً لو أنت حابب تشتري سيارة بحدود ال10 آلاف دولار لازم تحط مبلغ تأمين بحدود الألف دولار. حتى إذا رسى المزاد عليك ما تتهرب من إكمال الدفع واتمام عملية الشراء. 

ومبلغ التأمين إما إنك تحوله لحساب بنك كوبارت بأمريكا أو إنك تودعه بحساب فرعهم في الإمارات. 

الطريقة الثالثة للمزايدة هي إنك تخلي سمسار كوبارت بدبي هو يزايد لك مقابل 250 دولار بياخدهم منك فقط في حال ربحت السيارة أما إذا ما ربحت فما بياخد منك شي. وكمان لازم تحط عنده عشرة بالمية تأمين تسترده وقت تدفع ثمن السيارة يلي اشتريتها. 

الطريقة الرابعة بتحط شيك بقيمة 20.000 الف درهم كتأمين عند فرع الشركة بدبي وفيك تزايد مهما شئت لكن كل سيارة تشتريها في 250 دولار للسمسار بدبي 

وممكن تحط مبلغ ال 20.000 درهم كاش عندهم كمان في حال عدم وجود دفتر شيكات. 

الشحن:

لو أنت اشتركت بحساب لوحدك وزايدت واربحت بتقدر تشحن عن طريق اي شركة انت بتختارها. 

لكن لو السمسار هو يلي زايدلك أو هو يلي أعطاك اسم المستخدم وكلمة المرور معناها حصراً لازم تشحن عن طريقهم (كوبارت). ولازم تدفع له 250$ رسوم أنه هو يلي زايدلك. 

#يوجد ضرائب ورسوم من أمريكا يجب الانتباه لها ويجب أن تضعها في بالك وتضيفها على كلفة السيارة. 

لو كانت السيارة salvage title فهذا يعني أنك لازم تعمل حسابك على شي 400 دولار رسوم إضافية تقريبا . 

إذا السيارة clean title ماعليها هذه الرسوم الأخيرة. 

ممكن حدا يسأل ليش سيارة clean title تنباع بالمزاد؟ 

الجواب ممكن يكون نازل عليها برد أو كانت مسروقة. أو الضربة خفيفة أو صاحبها ماقدر يكمل دفعاتها. 

الشحن ممكن ياخذ مدة 45 إلى 60 يوم. 

  الموقع يوفر خدمة الحصول على تقرير عن تاريخ السيارة مقابل 9 دولار 

وخدمة الفحص فيك ترسل شخص محترف يقول لك شو فيها أعطال مقابل تقريبا 125 دولار بس لازم يكون في وقت قبل بيع السيارة أقل شي 4 أيام .

السيارة يلي اشتريتها وصلت بعد ثلاث أو أربع  شهور وتعتبر هذه مدة طويلة بسبب نوع الـ title وقمت بإصلاحها في المصفح أبو ظبي .

لا أعتبر نفسي وفرت شي من ناحية المال لكن أعتبر أنني اشتريت سيارة أعرف مافيها وأعرف جميع العيوب دون   غش أحد التجار أو المستوردين .

من يرغب بالشراء الآن في الإمارات يجب أن يتأكد من نوع حادث السيارة وهل يمكن ترسيمها وركوبها في الإمارات لأنه هناك قوانين جديدة صدرت بخصوص السيارات الواردة ويمكنك ذلك من خلال نفس الشركة يلي بدبي أو موقع حكومي إماراتي لا أذكر اسمه.